All Jôhr em Sommer ischd en d's "Essabaura-Garda" d's "Hasafeschdle" gwảa.
Dô hôt d'r Kleitierzüchterverei' Henna, Gees ond Enta, Hasa, Meerschweinla ond was se soschd no züchdet hent, ausgschdellt. Drzuanô hôts Blôsmusik, an Danzboda, raode Würschd, Zitronasprudl, Wäffela für aos Kender ond jede Menge Bier für dia Manna gea. Manch oener hôt an ghagleta Rausch ghet, 's send aber emmer de gleiche gwäa: M'r hôt schao em vornadrei gwißt, wer!
Dô hôt d'r Kleitierzüchterverei' Henna, Gees ond Enta, Hasa, Meerschweinla ond was se soschd no züchdet hent, ausgschdellt. Drzuanô hôts Blôsmusik, an Danzboda, raode Würschd, Zitronasprudl, Wäffela für aos Kender ond jede Menge Bier für dia Manna gea. Manch oener hôt an ghagleta Rausch ghet, 's send aber emmer de gleiche gwäa: M'r hôt schao em vornadrei gwißt, wer!
En d'r Schiaßbude hôt d'r Baba äll Jôhr so guat gschossa, daß 'r ens "'Stecha" komma ischd: 'S hôt sich äwl om da aerschda oder zwôita Platz dreht. Nôcher ischd d' Mamma mit am-a weißgschweafleda wiedena Bogakretta, bis obanô gfüllt mit schnaeweiße Ôier, ganz stolz hoemgloffa.
A Losbude ischd au dôgwäa, des war aeher (eher) aoser Sach. Dô hänt mir Kender ebbes gwenna könna: So bonde (bunte) Bälla mit Straoh (Stroh) gfüllt, mô am-a Fadagommi (Fadengummi) drôghanget send ond mô m'r ufanander schiaßa könna hent ond des Bälle äwl wieder zo oem zrückkomma ischd.
Amôl hôt mei Schwester da Hauptgewinn ghät: An wonderschöna weißa Hasa. Dean hôt se selber hoemtraga wölla ond em Oba seim Hasaschdall ischd extra für an a Fach freigmacht wôra!
Er ischd gwachsa ond gwachsa ond mô-n-r d's Alter ghät hätt, hôt an d'r Baba schlachta wölla. Sui hôts aber gspannt ond ihrn Hasa en d'r Schupf vrsteckt.
Nô hôt an d'r Baba et fenda wölla, 's ischd an anderer gmetzget wôra ond d'r weiße Hasa hôt leaba derfa, der ischd nô alt wôra.
Nô hôt an d'r Baba et fenda wölla, 's ischd an anderer gmetzget wôra ond d'r weiße Hasa hôt leaba derfa, der ischd nô alt wôra.
Jutta Berger